КУРЧЕ ДИНСТОВАНЕ
Курче порежеме на фалатки (красше кед останє цале), посолїме и положиме до шерпенки. Динстуєме го на масци так же додаваме покус води, док нє одмекнє. Вец го далєй пражиме полїваюци го з воду док нє почервенї.

КУРЧЕ НАДЗАТЕ
Курче порихтаме и меркуеме же бизме го нє барз порезали: лем ножки, главу, кридла и шию одрежеме и положиме до юхи. Курче посолїме и под скорку (або до бруховей глїбки) наполнїмє го зоз таку мишанїну: пупорок, шерцо и печинку на дробно пошекаме и подинстуєме зоз пошекану цибулю (а мож и сирове). Кед шицко мегке, вдериме до ньго вайцо, домишаме пошекане петрушково лїсце, посолїме, дакус попопруєме и додаме намоченого (у води або у млєку) хлєба и дакус масци. Добре помишаме и полнїме з нїм курче. Же би шицко нє випадло, дзиру зошиєме. Наполнєте курче положиц до рерни и вецей раз го преляц з масцу у хторей ше пече, док нє почервенї. Кед є готове, режеме го сциха меркуюци же би ше нє розтресло полнєнє.
Вислугуєме з даяким варивом (цушпайзом) або зоз шалату.

КУРЧЕ ПОХОВАНЕ
Курче розбереме и порежеме на фалатки, а вец го похуєме тиж так як и целячину.

КУРЧЕЦОВ ПАПРИҐАШ
Варешку масци и дас 2 цибулї на дробно пошеканей пражиме док цибуля нє будзе жовта. Положиме мелкей паприґи, помишаме и додаме порезане месо зоз курчеца. Посолїме, налєєме з воду и вариме док месо нє одмекнє.
Вислугуєме зоз затрепанима галушками хтори зме окреме виварели у води.