ФАЗАН У КАПУСТОВИМ ЛЇСЦУ
За тото єдзенє хасную ше лєм млади фазани. Очисциц фазана од пиря и бурачкох, добре умиц, посолщ з вонка и знука и надзац з дробно порезану сланїну. До дювечу положиц ложку масци, положиц фазана до рерни и печиц лєм петнац минути. Видвоїц лїсце зоз младей капусти, очисциц го, умиц, попариц з врацу воду, а потим виняц фазана зоз рерни и замотац го зоз тим попареним лїсцом хторе треба завязац зоз билу цверну. Знова положиц фазана до рерни, печиц го и часто залївац зоз соком. До того соку додац билого вина. Кед фазан упечени, порезац го так як ше реже и живина, составиц го до цалоеци, закриц з капустовим лїсцом, а зоз печеньом служиц капустово лїсце у хторим бул печени. Такого фазана положиц на стол.

ФАЗАН У СОКУ
Забити фазан треба же би лєжал, нєочисцени од пиря, голєм єдну годзину. Потим го очисциц од пиря и черевкох, умиц, и охабиц же би ше добре одцадзел од води. Фазана посолїц и цалого го намасциц з маслом до хторого пред тим треба положиц дакус млєтого попру. Фазана надзац з дробно порезану сланїну, а там дзе були бурачки положиц два менши кваскави яблука. Так порихтаного фазана положиц до дювечу и печиц у рерни. Док ше пече, фазана треба частейше прелївац зоз соком, а кед є уж скоро упечени, преляц 1/8 литри квашней шметанки (милераму). Кед фазан мегки, порезац го, поскладац фалатки до глїбокей судзини и посипац з дробно пошеканим петрушковим лїсцом. До соку додац ище дакус квашней шметанки и кус юшки, превариц на шпоргету, а потим преляц по фазанови.

ЯРАБИЦА ПЕЧЕНА З РИСКАШУ
Ярабицу очисциц од пиря и бурачкох, умиц ю и посолщ. До шерпенки положиц ложку масци и кед ше масц зогреє, положиц ярабицу най ше пражи, и додац шерцо и пупорок. Пупорок и шерцо скорей виняц, бо ше вони пража кратши час як ярабица. Кед ярабицово месо цалком мегке, треба ю виняц з масци. До истей масци додац главку дробно порезаней цибулї, наполи ю упражиц, и кельо єст ярабици, тельо додац шолїчки умитей рискаши. Помишац рискашу з цибулю и зняц