попражиц на масци. Додава ше и кус води же би шицко одмекло. На концу ше дода кус цеску, попру, мелкей паприґи и кус муки, та ше залєе и посолї по смаку. Маса муши буц густа. Хто люби горке може баржей попаприґовац, бо такей карменадли так и швечи. З тоту масу ше прелєю упражени карменадли и служа з праженима кромплями.

КАРМЕНАДЛИ У ПРЕЛЇВЕ
Потребне: штири карменадли, три векши цибулї, 2 ложки масци, солї, попру, сладкей паприґи, пол лимуна, очисцена парадича, деца и пол квашней шметанки, ложка муки.
Посолєни и попопровани карменадли спущиц на горуцу масц, та кус з обидвох бокох препечиц. Кажду карменадлу начухац з обидвох бокох з розрезану половку лимуна и наскладац до римского гарчка. До горуцей масци положиц колєчка цибулї, а вец попражени зляц на месо. Очисцену парадичу подзелїц на штири часци и поскладац на карменадли, та преляц зоз шметанку. Карменадли готови о 40 минути на температури 220 ступнї. Виняц их на танєр, а до врацого прелїву умишац ложку муки вимишаней у лимуновим соку, кус паприґи и веґети.
Додаток: барена желєнява (гращок, мауна).

КАРМЕНАДЛА ФИЛОВАНА ЗОЗ КУКУРИЦОВУ НАДЗИВКУ
Пририхтує ше за 2 особи.
Потребне: 250 ґ карменадли, 100 ґ млєтого меса, 100 ґ кукурици цукровки, 100 ґ кравского сира, 100 ґ сира траписту, 50 ґ майонезу, 50 ґ масла, 1 вайцо, 1 цибулю, соль, попер, веґета по смаку.
Поступок: Карменадли пререзац на три часци, полупац их и випечиц на рожню, пошоровац их до тепши, посолїц, додац кус веґети, а помедзи посипац пошекану цибулю и масло.
Кукурицу цукровку вариц 5 мин. у горуцей води, одцадзиц и охладзиц. Помишац млєте месо, кукурицу цукровку, кравски сир, вайцо, соль, попер и веґету. Порихтану надзивку у форми плєскавици положиц на кажди фалаток карменадли, а од верху пошоровац по фалаток траписту и запечиц у зогратей рерни. Сервировац цепле.