КИТАЙСКИ ТАНЄР
Потребне за 4 особи: 400 ґ увареней рискаши, 1/2 кґ печинки зоз живини, 1 кґ швижи шампиньони печарки, 4 печени паприґи як на шалату, 100 ґ младей нарезаней капусти, 10 маслинки нарезани на дробно, 100 ґ увареного гращку, 1 конзерва риби туни и присмаки.
Перше ше капуста, маслинки, поджамена риба и гращок помиша и дода ше присмаки: солї, попру, олєй з риби и зоз тим филом полнїц печени паприґи як шалату и охабиц най чека.
Окреме ше пражи печинка и печарки (перше печинка, а такой потим у истим олєю и печарки). На тацну перше паложиц рискашу и од нєй направиц подлогу за печарки и печинку. По стредку пошоровац шалату зоз полнєней паприґи, а на єдну половку пошоровац печинку а на другу половку печарки. Єдзенє ше обично пририхтує за вечеру.
Надпомнуце: и печарки и печинку треба посолїц по смаку и попопровац.

МУТЬКАЛИЦА
Потребне за штири особи: 1/2 кґ цибулї, швижей паприґи бабури 2—3, два струча цеску, 0,5 кґ швижи парадичи (хто люби горке, най положи желєни папрички), потим 0,5 кґ меса.
Цибулю очисциц и порезац на дробно, бабуру порезац на резанки, додац цеснок порезани на дробно, пражиц шицко на олєю (1,5 дл), додац, кед цибуля пожовкне, нарезани парадичи и охабиц шицко най ше динстує. Додац веґети 1 ложку, попру, 1 ложичку мелкей паприґи и горкей папрички. Месо порезане печиц на роштилю лебо на плотни. Кед є готове, порезац шницли на резанки и помишац до мутькалици. Шицко ище дакус подинстовац, а найлєпше шицко рихтац у склєняней судзини закрите з покривку. До мутькалици по своїм находзеню можеме додац увареней рискаши, варени кромплї порезани на коцки. По верху треба посипац з нашеканим петрушковим лїсцом.

ПЕТРОВСКА (СЛОВАЦКА) КОЛБАСА
Потребне: 1 кґ швиньского меса зоз сцегна, 16 ґ солї, 3 дкґ млєтей сладкей (або горкей) червеней паприґи, кущичко киму, мелкого попру и єдно струче цеску.