Поступок: До стреднє грубо зомлетого меса додамє соль, попер, ким, добре пошекани цеснок и шицко добре розмишаме. Потим месо надзиваме з фурчу або на машинки, на котру зме приправели специялну цивку, до ценких швиньских або целячих черевох (колбашнїцох). Швижу колбасу печеме на дакус масци и води. У жимским чаше так направени колбаси охабиме єден дзень на воздуху най ше суша, а вец их дакус окуриме. Кед зме надзали до грубших (саламових) купчих колбашнїцох, вец их сушиме длужей.

ПЕЧЕНА РИБА З КРОМПЛЯМИ
Порихтац: 1—1,5 кґ рибу (найлєпше потьку), 1 кґ кромилї, 2 векши цибулї, олєю, попру, мелкей паприґи, солї.
Поступок: До тепши складац по єден шор на колєчка норезани кромплї, посипац пошекану цибулю и заш єден шор кромплї, та цибулю. Кажди шор кус посолїц, попаприґовац и попопровац по смаку, та преляц зоз жимну воду. На верх положиц очисцену и добре умиту, кус посолєну рибу. Зависно од того же яка є тлуста, од верху рибу преляц з олєйом. Кед є нєдосц масна, вец преляц и кромплї. Печиц у рерни покля верх нє почервенї и кромплї нє одмекню. По потреби, з часу на час, доляц горуцей води же би ше кромплї нє осушели.
Сервирує ше у тепши у котрей ше пекло.

ПЕЧЕНА РИБА З РИСКАШУ
Пририхтац: 1—1,5 кґ риби (найлєпше потьку), 0,25 кґ рискаши, 2 главки цибулї, олєю, попру, мелкей паприґи, солї.
Поступок: До тепши усипац пребрану рискашу, заляц з воду (най ю вода покриє), пошекац цибулю як на запражку, посипац ровномирно по верху, попаприґовац, попопровац и посолїц по смаку и шицко добре премишац. Очисцену и добре умиту, кус посолєну, рибу положиц на верх рискаши. Кед риба досц масна, вец лєм дакус по верху поляц з олєйом, а кед з поснєйша, вец попри риби преляц и рискашу. Печиц у рерни покля рискаша нє омегча и риба нє почервенї. По потреби з часу на час, долївац горуцей води покля рискаша нє будзе мегка.
Надломнуце: на верх рискаши мож положиц єден шорик кромплї порезани на колєчка и аж вец положиц рибу. Сервирує ше на тепши у котрей ше риба пекла.

Опатьце видео як ше прави риба на тепши (кликнїце на линк):