ПЕЧЕНА РИБА НА ТЕПШИ У ЦИБУЛЬОВЕИ МАЧАНКИ
Очисциц цибулї так же би у швижим стану прекрила тепшу 2—3 см. На даскельо места положиц швиньскей масци (коло 3 ложки), або хто прави з олєйом коло 2,5 дл алею. Цибулю ше перше попражи на тепши и додава ше єй покус води так же би ше помали динстовала. После каждого додаваня води вше додац и дакус муки и премишац так же би ше на єдну тепшу потрошело коло єден погар од 2 дл муки. Мачанку посолїц, попоровац, а хто люби горку, може положиц и горку паприґу. Додац дакус мелкей паприґи и кед цибулька упечена, динстована, вецей як половку од горе, до мачанки ше кладзе цала або порезана на поли по длужини потька, позарезована там дзе месо грубше же би могло пущиц свой оок. Потька добре жи би була з риболова кармена (тришорова лєбо без лупох), бо така ма вецей масносци и соку котри запечени вєдно з цибульку дава окремий пах и смак. До мачанки мож додац и дакус парадичанки (лєм тот хто люби), а место потьки мож похасновац и харчу, терпеши лєбо дробну рибу так же би ше могла упечиц на сухо. Од присмакох мож хасновац мацерову душичку, морски орещок лєбо розмарию. Рибу треба надосц посолїц.


ПЕЧИНКА ПРАЖЕНА
Печинку порежеме на ценки шницли, посолїме ю на обидва боки и попражиме на горуцей масци.

 

ПОЛНЄНА ХАРЧА
Пририхтує ше за 4 особи.
Потребне: 1 харча маси 400 ґ, 1 вайцо, 30 ґ кукурици цукровки, 30 ґ швиньского мозґу, кус петрушкового лїсца, солї, попру, веґети и олєю по смаку.
Поступок: Харчу очисциме, алє меркуєме же бизме нє пребарз отворели брухову глїбку хтору треба наполнїц зоз слїдующим полнєньом: на маслу або олєю попражиц кукурицу цукровку и швиньски мозоґ, засмачиц по смаку и змишац з витрепаним вайцом. Зоз тим полнєньом наполнїц харчу и таку пражиц на маслу або олєю, а може и на маслиновим олєю.