Таки косцови софт, кед ше обогаци з кус шметанки, барз смакує з фаширами и мауну (як цушпайз).
Спомнути софт з кус вецей парадичанки добри прелїв за пражени шницли зоз праженима кромплями и зоз на густо гращком.
Наостатку, сам софт з уварену рискашу може буц смачне єдло, як и з уваренима кромплями.

ТАТАРСКА МАЧАНКА
Потребне: 1 вайцо, 1 кафова ложичка оцту, кущичко попру, солї на конєц ножа, 1 дл олєю, 1 ложка сенфу, мала огурка (квашена), цибулька (така як орех), 1 дл квашней шметанки.
Поступок: Витрепеме або у миксеру вимиксируєме 1 цале вайцо, додаме оцет, попер, соль и олєй, котри долїваме з капканьом. Так достанєме основни майонез. До ньго додаме на дробно пошекану малу квашену огурку и цибульку, дакус витрепеме або вимиксируєме и на концу додаме 1 дл квашней шметанки. Цибульку треба лєм кущик мишац або миксировац же би нє згоркла. Додава ше ґу похованому сиру, карфиолу, и ґу рижним месом.

ФРАНЦУЗКА МАЧАНКА
Увар на твардо єдно векше вайцо, очисц го, бильчок пошекай на дробно, а жовчок претри през шитко. Претарти жовчок помишай зоз сировим жовчком, а додай пошекани бильчок и пол деци квашней шметанки. Тото помишай, а вец на масци праж муку до котрей додаш пошекани попер, залєй з говедзинову юху лєбо з воду тельо же би була заш лєм густа мачанка. Кед тото варло дас ферталь годзини, усип и вайца як ши их пририхтала. Посоль по смаку.

ЦЕСКОВА МАЧАНКА
Направ запражку з масци, муки и на дробно пошеканого цеску, залєй з воду лєбо юху, посоль ,и довар. Служ ґу вареному месу и кромпльом.