РУСКА ШАЛАТА II
У месовей юхи увариц петрушку, мархву, целер, порезани па менши коточки, вец 2—3 уварени кромплї, 2—3 метни квашени огурки, 2 сирови яблука — шицко порезац и помишац.
Окреме з 2—3 жовчкох направ майонез: жовчки добре мишай и покус долївай 2 дл олєю (зейтину) док шицок олєй не премишаш и док ше не направи густа маса. Тот майонез умишай до спомнутей шалати, а пред тим умишай до нєй добру ложку сенфу, сардини з 1 конзерви (порезац их на дробно и поцифровац од верху шалату).

СЕРБСКА ШАЛАТА
Прави ше з коцкох цибулї, парадичох, огуркох, паприґох и горкей папрички. Шицко треба посолїц и поолєйовац по смаку.

СЕРБСКИ АЙВАР
У пецу ше упече 4—5 белави парадичи и 15 векши желєни паприґи. Печену парадичу и паприґу ше очисци од лупи, пошека або зомелє на машинки, посолї, попопрує, потим ше до нїх дода дакус нашеканого цеску, 6—7 ложки финого зейтину и оцту по смаку. Шицко ше добре премиша и хаснує за едзенє.

ТАЛИЯНСКА ШАЛАТА
Обари ше 5—6 векши кромплї, очисци, пореже на коцки. Гу тому ше дода 2 очисцени и на коцки порезани квашни яблука, 1 огурка порезана на коцки, 1—2 главки пошеканей цибулї; посолї ше и прелєє з майонезом (о майонезу тиж писане у тей кнїжки). Шицко ше премиша и крашнє покладзе до миски.

ТАРТАР (ТАРАТОР) ШАЛАТА
Тота шалата ше ридко прави, а барз є смачна. Прави ше г? колєчкох огуркох (даґдзе ше огурки анї не чисца), прейґ нїх ше нашека горки папрички, цеснок, петрушково лїсце, дода ше попер, а вец ше шицко прелєє з кислим млєком.