У даяких специялних диєтетских предписаньох — наприклад при хоротох шерца и покруткох — огранїчуе ше хаснованє кухньовей солї.
Хлор провадзач натрию, та им жридла у природи исти. Орґанизму є потребни за творене хлорогидроґенскей квашнїни, хтора нєобходна у процесу претровйованя.
Калций и фосфор находза ше у млеку, вайцох, сиру, шпинату и др. Важни су за розвиване и рост, а окреме за вибудов косцох и зубох. Без нїх би нам косци були крегки, викривени и легко би ше ламали. Же би ше тоти минерални материї правилно хасновало у нашим орґанизме, нєобходно потребне же бизме коло нїх уношели и витамин Д, бо вон допомага ушеданє калцию и фосфору у косцох и зубох.
Недостаток калцию спомалшуе рост дзецох, правилне розвиване їх косцох и зубох. Стреднє количество калцию, хторе каждодньово потребне одроснутим, виноши 0,8 ґрама, а за дзеци коло 1 ґрам.
Желєзо важни состойок нашей креви. Червени кревово заренка, хтори маю у себе желєза, маю позарядове значене за намирянє клїтинкох нашого цела з оксиґеном з воздуху. Дньово потреби за желєзом виноша коло 12 милиґрами. Дзецом у вчасним дзецинстве, под час пубертета и женом, окреме под час ґравидносци, желєзо нєобходне. Нєдостаток желєза спричинює малокревносц. Желєзо ше у природи находзи у шицких файтох меса, а окреме у печинки, шлїжинки, жовчку, маунастих рошлїнох и желєней лїсцатей желєняви. Млєко худобне у желєзу, цо окреме треба мац на розуме у дзецинским костираню у хторим млєко забера значне место.
Йод. Познате же ше зявеня ґушавосци стретаю у крайох дзе вода и пожива худобни у йоду. Же би ше тото зявенє зопарло, препоручуе ше хаснованє такволаней йодовей солї. То, у ствари, обична кухньова соль хторей додати мали количества злученїни йоду. При тим смак, запах и фарба солї оставаю нєпременєни. Потреби у йоду минимални, алє його количество у овоцох и желєняви пременлїве и завиши од води и жеми на хторей рошнє.
Вироятно же и други минерални материї потребни организму, алє понеже вони ище нє достаточно випитани, о нїх нє будзе ту бешеди.

ВИТАМИНИ

Нєшка ше о витаминох вельо бешєдує як о важних состойкох поживи, чий нєдостаток приводзи до рижних нарушеньох у орґанизме, гоч вони нє служа анї як материял за будоване клїтинкох анї як енерґийне жридло.