одпочине — кишнє. Док зле цесточка одпочиваю, вимишаме 25 дкґ масци (або 30 дкґ маргарину), помасциме цесточка и 2 по 2 цесточка злїпиме з помасценим боком. Злїпени цесточка прикриєме и охабиме знова 20 минути одпочинуц. Одпочинуте цесто положиме на помучену хлєбовку або парток, розцагуєме го покля ше пода. Так порихтане цесточко можеме полнїц з чим сцеме (напр. з маком, сиром, орехами итд.). Полвзне кладземе на кажду половку, вецей ґу крайом, и скруциме перше єдну а вец другу половку ґу стредку. На таки способ настали два рейтеши котри прережеме и оддзелїме єден од другого. Кажди рейтеш кладземе на намасцену тепшу єден коло другого и охабиме киснуц дас пол годзини. Упечени порежеме на фалатки яки сцеме и посипеме з цукром.

РУКАВИ (РЕЙТЕШИ) З КРОМПЛЯМИ
Потребне за 8 особи: цибулї нарезанеи 0,5 кґ, 2 дл олєю, кромплї сирови натрец 1 кґ, солї и попру по смаку, пол кили цеста за питу.
Цибулю попражиц на олєю, додац натарти кромплї и шицко розмишац. Цеста (вибрац най буду цали) престрец по два на столе и на стредок их полнїц зоз кромплями. Закруциц шицко вєдно до рукава и складац до подмасценей тепши лєбо плеху за печене. Рукави (рейтеши) складац єден коло другого. Пред печеньом попирскац их з масцу. Печиц у рерни на температури 225 ступні коло 20—25 минути. Єдло ше сервирує скорей од даякого другого єдзеня лєбо за вечеру.


Торти


БЕЧКА ТОРТА
Добре розмишац 21 деку масла з 21 деку цукру и 9 жовчками. Додац 10 деки одмекнутей чоколади, 23 деки муки и тварду пену з 9 бильчкох. Шицко ше полегко розмиша и усипе до намасценей фурми, та ше на цихим огню пече. Печена и охладзена торта ше розреже на 3 часци и филує.