Млєко ше достава од домашніх животиньох: кравох, овцох, козох а и од бияли. По своей моци биялово млєко приходзи на перше место.
При доєню треба обрациц окремну увагу на чистоту вимня и особну чистоту судзинох до хторих ше млеко дої.
Але кед ґаздиня не дої сама свой статок и млєко купує нєпаковане у индустрийних млєчарньох, треба же би го такой прецадзела през густе шитко. После того млєко треба наляц до чистих судзинох и вариц на моцнєйшим огню. Судзина за варенє млєка треба же би була зошицким чиста. Тоти судзини ше нїґда нє шму хасновац за варене других єдлох, бо и кед ше найлєпше умию, можу затримац запах од єдла и тот запах познєйше пренєсц на млєко.
Млєко треба же би ше чувало у завартих, нєпревидних судзинох на жимним месце, же би ше охранело од вплїву шветлосци, цеплоти и заґадзованя з воздуху. Окрем того, блїзко при ньому нє шму буц материї з моцним запахом як цо то витрион (петролей), мидло и под., бо их воно барз легко прима.
У ґаздовстве млєко ма барз вельку улогу, бо з нього мож готовиц рижни єдла, слани и сладки: кисле млєко, квашна шметанка, каймак, сладка шметанка, масло, рижни файти сира, цмар, серватка. После вреня настава кисле млєко, йоґурт, кефир и кумис. Кед ше шметанка механїчно муци, настава масло хторе ма у себе 85 проценти масци. Потим ше з млека правя рижни сладки єдла як цо рискаша у млєку, ґрис, била кафа, рижни кохи, палачинки, пити, креми, надзивки, прелїви та и бонбони.

МЕСО

О хаснованю меса у костираню єст найвецей предрозсудки. ІІокля єдни твердза же за чловека нєобходне же би єдол меса, други, наприклад веґетариянци, подполно го виключую зоз костираня.
Месо ше состої углавним з мускулових влакнох. З меншого або векшого количества бильчкох, а окреме масци, завиши його поживна вредносц.
Же би чловек витворел подполну потребу у бильчкох, треба же би поєдол пол кили меса на дзень, алє понеже у другей поживи бере бильки, потребив количества меса вельо менше. Кед ше греє, месо траци у чежини пре ошлєбодзенє чечносци, алєе му рошнє змист у бильчкох и масци.
Претровлївосц меса завиши од файти меса, количества масци и способу пририхтованя. Кед стої, месо постава мегчейше, бо з угльових гидратох (ґликоґену, з мускулових влакнох) постава млєчна и фосфорна квашнїна хтори розмегчую вязну ткань.