Нагоблюйце або нарежце капусту як на шалату и положце до векшей склєняней або керамичней судзини пасмо по пасмо, Кажде пасмо посольце. Положце дещичку котра закриє цалу капусту и прицишнїце зоз чежким предметом, та охабце на швижим месце три днї. Потим виньце капусту, добре одцадзце, та покладзце до дунцох. Окреме преварце оцет зоз зарнами попру. З охладзеним оцтом прелєйце капусту и повяжце дунци.

КВАШЕНЄ КАПУСТИ ЗА ЖИМУ
Квашена капуста барз здраве єдло, окреме у жимским периодзе кед нєт другей желєняви. Мож ю квашиц на вецей способи. Найчастейше ше кваши на дробно порезана на специялним гоблю, а помедзи порезану ше уклад а цали главки (крижалки) на сарму. Мож класц и цали главки.
Поступок: Капуста ше пореже на специялним гоблю, або на дробно пореже з ножом. Порезану капусту ше кладзе пасмо по пасмо до древеного (або пластичного) гордова. Кажде пасмо од верху посолїц (єдна гарсц солі на єдно пасмо). Треба ускладзиц грубину пасма зоз количеством солї спрам смаку, же би капуста не була барз слана и же би ше ю пред хаснованьом не мушело премивац.
Кед ше насклада даскельо пасма и помедзи нїх єден шор цали главки зоз котрих пред тим вирезани кореньчок (грубле), капусту треба добре поприцискац (найлепше з древеним млатісом або з песцами, а дахто ю и ґажи з босима ногами котри пред тим добре умити) же би пущела юшку. Дахто од верху на кажде пасмо посипе дакус рашки (киму) або цалого попру, а кед ше сце же би мала ясну або жовту фарбу, додава ше яблуко або бишалма або цали зарна кукурици. Кед ше сце же би була червенкава, додава ше дакус червеней цвикли.
Гордов треба наполнїц дас на три ферталї. Кед капуста поубивана так же пущела юшку котра прокрила цалу поверхносц, прекриє ше зоз чисту и випейґлану билу ридку ренду на котру ше посклада чисти, з горуцу воду поумивани дещички (денка) и сцишнє з древеним шрубом (котри представя состойну часц специялного гордова на капусту), або чежшим каменьом котри пред тим тиж умити у горуцей води. Гордов ше даскельо днї трима на цеплєйшим месце, покля капуста нє скишнє. На верху денкох ше влапи осуга котру тпеба попяднє змивац так же ше денка винє, а потим и била юенда. Ренду ше ігоерайбе у превареней води, а и денка ше змиє з таку исту воду. Уквашену капусту ше трима на жимнєйшим месце, але мерковац най нє змаржнє.