На експериментални способ утвердзене же ше варене месо лєгчейше претровює од печеного. Пошекане месо, заш, лєгчейше ше претровює од векших фалаткох, бо го жалудкови сок найлєгчейше розмочує и лєпше претровює.
Сирове месо нє одвитуюце за костиранє, бо ше чежше претровює (пре вязну ткань), спричинює звекшане гнїце у черевох и постої опасносц од уношеня черевових паразитах (пантлїчарки, хлїсти) до орґанизма.


ЖИВИНА

До живини спадаю: кура (когут, курче), качка, гуска, и пулька.
Месо зоз живини барз смачна пожива, лєгчейша як гоч хтора друга. До живини спада и голуб.
У варошох живину мож купиц зарезану або живу. По випатрунку живини такой мож познац на хтори є способ кармена. Кед була пущена лєм на пашу и нє кармена є зоз зарном, не будзе анї по випатрунку добра, а анї смачна за єдло.
Часто ше случує же живина хора од рижних хоротох и прето барз опасне куповац ю зарезану кед є скорей того нє препатрена ветеринарски.
И кед ґаздиня купує живу живину, треба же би мала искуства у купованю и же би осторожно патрела кельо живина чежка, же би єй омацала першову клїтку, по хторей такой увидзи чи є добре викармена.
Же би месо зоз живини було цо сухше и мегчейше, треба ю зохабиц най обрана на ляду або мразу стої одредзени час.


ДЗИВИНА

Дзивину углавним набавяме забиту. Накельо дзивина скорей забита, а длугше остала на мразу або ляду, нательо месо з дзивини будзе мегчейше и смачнєйше за пририхтованє.
Дзивина ше хаснує у кухнї углавним од єшенї до яри, у мешацох кед закон допущує забиване дзивини.
Месо дзивини барз поживне, а понеже воно звичайно нє барз масне, тото месо и лєгко претровлїве. Очисцену дзивину пайчастейше ше надзива зоз сланїну же би масц зоз сланїни надополнєла месу тоту масц хтору воно иншак нє ма. Забиту дзивину мож нєрозпарану тримац на воздуху, алє накеди ше унєше до обисца, муши ше такой розобрац.
Скору зоз дзивини нє треба знїмац скорей як цо ше дзивину будзе пририхтовац же би ше одарта дзивина, могла отримац вецей днї, а же би одмегчала, кладзе ше ю до маринади, та ю на тот способ, без обаваня же ше погуби, мож зачувац и даскельо днї.