КЕЛЕРАБ
Пририхтоване: очисцце од лупи, та млади (котри сцеце полнїц) охабце дали, а можеце и натрец на тарлє (за вариво). Бланшируйце 3 минути цали, 2 минути потарти.
Час тирваня: 12 мешаци.
Одмарзованє: не потребне. Можеце их такой покласц до врацей води або динстовац.

КРОМПЛЇ
Пририхтоване: резултат не цалком сиґурни, але кед сцеце, можеце змарзнуц сирови млади кромпльочки, котри побланшуєце 4 минути. Стари кромплї можеце нарезац за праженє, дакус попражиц (най омегчаю, але най не достаню фарбу добре одцадзиц од масного та змарзнуц.
Час тирваня: сирови 10 мешаци, попражени 20.
Одмарзованє: нє потребне. Кладзце просто до врацей сланей води або до олєю.

КУКУРИЦА НА ВАРЕНЄ
Пририхтоване: очисциц млади чутки цалком од лїсца, векши можеце и порезац. Бланшируйце 4—6 минути, змаржнїце у мещкох. Можеце ю и олупац, бланшовац 3 минути, змарзнуц розсипане зарно и посипац до мещкох.
Час тирваня: 10—12 мешаци.
Одмарзованє: чуточки охабиц през ноц у фрижидере. Зарно сипце просто до врацей води.

КАПУСТА
Пририхтоване: розрежце главку на менши фалатки, одстраньце очкодовани лїсца и бланшируйце 1,5 минути. Охладзену покладзце до мещкох. Або: порежце на дробно, бланшируйце лем пол минути.
Час тирваня: 10—12 мешаци.
Одмарзованє: нє потребне, змарзнуте можеце вариц у врацей води або динстовац.