КОЛБАСИ И ПАШТЕТИ
Пририхтоване: такой по пририхтованю змаржнїце накадзи ше охладза. Колбаси змарзайце поєдинечно, та их пакуйце уж змарзнути.
Паштету змарзайце у пластичних шкатулкох.
Час тирваня: 2 мешаци.
Одмарзованє: охабце през ноц у фрижидеру. Колбаси котри нє барз груби, такой можеце вариц або пражиц.

НУКАШНЇ ОРГАНИ
Пририхтованє:
Покрутки прережце по поли, очисцце шицку масц, нукашню скорочку, добре вимийце и поуцерайце, та змаржнїце.
Мозоґ тримайце єдну годзину у поквашнетей води, очисцце блану. Потим змаржнїце.
Печинку мож змарзнуц цалу або порезану на фалатки и дакус подинствовану.
Целячу шлїжинку тримайце 2 годзини у жимней води, бланшируйце 2 минути. Добре ю утрице и остраньце блану у котрей є окруцена.
Главу очисцце цо баржей од косцох и преварце.
Шерцо добре очисцце од масци и бланох, та порежце.
Час тирваня: три мешаци. Варене тярва дакус длужей.
Одмарзованє: порезану печинку и покрутки можеце пражиц або динстовац нєодмарзнути. Мозоґ и главу нєодмарзнути положце до врацей води най ше варя. Инше одмаржнїце у фрижидеру, та порихтайце як сцеце.

ЖИВИНА
Пририхтоване: кед порежеце и пообераце, добре би було кед би живина дакус одлєжала на жимним (у фрижидеру) и аж о два дні ю положиц змарзнуц у цалє або у фалатох. Нукашнї органи треба змарзнуц окреме у мещку.
Час тирваня: масна живина (гуски, качки, кури) 10 мешаци, худа живина (курчата, млади пульчата) 12 мешаци, нукашнї орґани 2 мешаци.
Одмарзованє: 10—13 годзини (зависно од велькосци, а дали вельки гуски або пульки аж и 24—26 годзини), а вариц можеце такой, без одмарзованя.