мож гоч дзе, лем треба же би просторий була заварта и же би дим не виходзел з нєй. Барз важне же би то не бул огень, лєм дим, же би не було зогриванє — але жимне курене, іреба вибрац таку огриву цо не дава неприємни запах котрц месо упие. Найлєпше мац пиловину, чутки, або и кукуричанку. Же би то нє горело, лєм ше курело, треба дакус намочиц. Месо ше муши завязац високо, без страху же ше нє окури, бо дим, понеже є лєгчейши од воздуху, вше идзе горе.
Кед месо и сланїну вибереме з росолї, треба их поумивац у жимней води и охабиц на жимним месце обешени най ше добре осхню. За тото досц дзеньдва, окреме кед мрази. Вецка ше тоти фалати кладзе куриц, але нє шицки єднак. За сланїну досц лєм два днї, лєм най „запахне". Дробнєйши фалати меса ше охабя пейц днї, а шунки доори дзешец днї. Зоз куреньом ше, у ствари, закончел процес конзервованя, а вецка почина сушене. Кед месо, сланїна, шунки, колбаси и инше окурени, треба их положиц на цуґ най ше суша. Кед досц жимно, тоти фалати найлєпше положиц на пойд або до коморки ґу отвореному облаку. Цо температура нїзша, то лєпше.
Колбаси, гурки и бендов ше тиж куря. Кед су готови, муша одстац дзеньдва на жимним и цуґу, та ше аж вец их кладзе куриц. Досц кед стоя на диме штирипейц днї.
Сланїну мож єсц такой накадзи ше окури, колбаси и дробнєйши фалати меса муша одстац на цуґу, а шунки анї нє мож єсц док ше добре нє висуша. И их нє треба тримац мешацама на цуґу же би ше нє висушели до косци и нє страцели свой характеристични пах и смак, як и мегкосц. Добре осушени фалати меса, колбаси, шунки мож хасновац на вецей заводи без страху же ше на начатих местох погубя, алє и теди муша стац на жимним и на цуґу.

Колбаси

Колбаси и шунка найглєданши войводянски специялитети. За добри колбаси треба добре месо, цо прави майстрове напевно знаю. Воно нє шме буц масне, зоз сланїну, але нє добре анї посне, бо колбаса будзе тварда. При Руснацох звичай зрезац и похребцину до колбасох, орезац ребра, та и маснєйши часци меса, а при Сербох ше похребцина реже на длугоки фалати и суши як окремий специялитет: пршута. Таке месо ше вше частейше миша и з говедзину, та вец ґу ньому мож додац вецей сланїни. Гваря же така мишана колбаса смачнєйша и же може длужей тирвац.
Углавним, тото месо ше зомелє на машинки, дода ше мелкей паприґи (на єдну стокилову швиню досц обезпечиц 100