Кед ше овоц обера, муши ше мерковац же би ше нєочкодовала. Найлєпше ю оберац з руками. Єст барз високи древа зоз хторих нє мож овоц з руками пооберац. За тот циль служа окремни направи. Направа ше состої з длугокей палїци на чиїм концу заглобена длугока плехова кошарочка, хтора на концу ма два ножики. Кошарочку на длугокей палїци подложи ше под саму овоц и вона директно спаднє до плеховей кошарочки и пообера ше ю без велького очкодованя. Од способу обераня овоци завиши и єй отримованє.
Кажда овоц ма свой час кеди дозрева и спрам того ше дзелї на: лєтню, єшеньску и жимску овоц. Гоч жимску овоц мож длужей зачувац, и лєтню овоц ше одклада на вецей способи же би ше ю вжиме могло хасновац у обисцу.
Лєтню овоц мож сушиц на тот способ: вишнї, черешнї, кайси, грушки и шлївки суши ше на слунковей цеплоти. Вишнї и черешнї суши ше вєдно з маґочками, а кайсом и шлївком треба виняц маґочки та их алж вец сушиц. Сушену овоц збера ше до окремних платнових мещкох хтори ше трима у просториї дзе єст досц шветлосци и воздуху. Так осушену овоц треба, пред хаснованьом, умиц у даскелїх водох, потим ю мишац и вариц зоз цукром як и кажди компот.
Кед ше овоц одклада у менших количествох, за домашнє хаснованє, мож ю тримац и у векших ладох. Кажде яблуко закруциц до чистого паперу, лєм мерковац же би яблука були здрави. Закруцени яблука шоровац до слами. Кажди шор закриц з грубим пасмом слами же би ше яблука нє дорушовали. На тот способ можу ше яблука отримац и длугши час. Окрем сушеня и одкладаня овоци на полїчкох або у ладох може ше овоц конзервовац у цукру же бизме ю мали през цалу жиму.
Зоз овоци ше прави: компоти, сладка, джеми, маджуни, сулци, соки, овоцово сири, а овоц служи и як додаток за филованє питох и колачох.
Спомли зме же ше овоц дзелї на лєтню, єшеньску и жимску. Лєтня дозрева до септембра, єшеньска до новембра, а жимску овоц охабя ше длуго на древох, аж по мраз. До жимскей овоци спада: яблуко, грушка, куцкуруша, мушмула, бишалма и шипка. Тота овоц ма у себе досц цукру, витамини и бильчки, и претоє барз хасновита за орґанизем.


ОЛЄЙ

У нашим костираню барз важне место забераю масц, масло и олєй. За орґанизем ше рахує же найздравше масло, потим олей, масц и конечно овчи и говедзинов лой.
Найлєпши олєй достава ше з маслинового урожаю маслинки. Мож го достац и з нашеня слунєчнїку, сезаму и других рошлїнох хтори даваю олєй.