Шпляхи од какава. —Кед су швижи, найлєгчейше ше знїмаю так же ше намачаю з ґлицерином а потим вирайбу у лїтней води у хторей ест дакус солї.
Шпляхи од тинти. — Швижи шпляхи одстранїце кед на нїх вицадзице лимун, посипеце зоз солю и охабице най так поетоя, а потим их виплокаце у жимней води. Тото треба повторйовац покля ше шплях не страци. Окрем того, таки шпляхи мож одстранїц и кед их умиєце з горуцим виненим оцтом, а платно можеце виплокац у води.
Стари шплях од тинти треба чухац з рендочку намочену до 90процентного алкоголу. Кед ше осуши, платно вирайбеце. Так ше чисца и шпляхи од хемийного клайбаса. Под платно добре положиц упиваци папер.
Шпляхи од тинтового клайбаса. — Очисцице их зоз чистим бензином, або их намачаце зоз шпиритусом и охабице най так поетоя, а потим их висцераце зоз чисту ренду.
Шпляхи од воску. — Перше фалатки воску зоз платна ошкрабце з ножам, а вец на шплях положце упиваци папер и прейґ нього прецагнице з горуцу пейґлу. Кед треба, повторце то вецей раз, але вше з другим упивацим папером (место упивацого паперу мож похасновац и други чисти папер хтори упива чечноеци).
Ище лепше кед пред пейґланьом почухаце шплях зоз 90процентним алкоголом, вищеткаце го добре и аж вец випейґлаце прейґ упивацого паперу.
Шпляхи од швички. — Шплях од стеаринскей швички треба одстранїц так: шплях треба положиц медзи два упивали папери и прецагнуц зоз горуцу пейґлу. Розтопени стеарин упиє папер. Преостату масц потим одстранїц зоз алкоголом або бензином.
Тоти шпляхи мож одстранїц и так же ше их прелеє зоз колоньску воду и охаби осушиц. Теди стеарин постане тварди и легко го ошкрабац з ножом. Преостати шлїди вицагнє упиваци папер по котрим ше прецагнє з горуцу пейґлу.
Шпляхи од червеного воску. — Перше сциха познїмайце фалатки воску, а шплях потим чухайце з рендочку намачану до шпиритусу або бензину, або до єднаних часцох алкоголу и терпентину.
Шпляхи од смоли. — Тоти шпляхи очисцице кед их перше почухаце зоз швиньску масцу, та их намидлїце и охабице най поетоя, а вец их вирайбеце раз у води, раз у терпентинским олєю (по даскельо раз).