У рискаши єст коло 75 проценти крохмалю, дакус бильчки и дакус масци. 3 рискаши ше пририхтую рижни єдла: пилави, ризота, рискаша у млєку и рижни колачи. Окрем того, виварює ше як додаток до рижних юшкох. Же би рискаша була добре уварена, правило тото: на 1 шольку рискаши класц 2—3 шольки чечносци.
3 рискаши ше пририхтує рискашова мука з хторей ше прави рижни мачанки, креми. Тота рискашова мука пририхтує ше на тот способ же ше рискашу умиє, оцадзи од води и влажну тлуче док ше нє претвори до пращку. Потим ше ю осуши, ошива, суху збера до окремних шкатулох и одклада ше ю по хасноване.


ПРИСМАКИ

Нашо домашнї присмаки то копер и петрушково лїсце. И єден и други присмак барз вельо ше хаснує у нашей кухнї, окреме петрушково лїсце, хторе ше кладзе менєй-вецей як додаток каждому єдлу.
Найпознатши присмаки у нас то: копер, горчица, розмария, ким (рашка), ловорово лїсце, ванилия, гвоздзики. найквирц, майоран, капра, шафран, анис, цимет, естраґон.


КАФА

Под назву „кафа" подрозумює ше нашеня рошлїни Соffеа чия колїска Етиопия. Рошлїна рошнє у форми барвинкового черяка, а плод здогадує на черешню. Узрети плоди ше перше осуши, та ше потим з нїх вибера зарна. Сирове зарно кафи жовкастожелєней або кафовкастей фарби и ма у себе (алкалоїд) кофеїн, на чиїм ше дїйстве снує дїйство кафи на нервну систему, мускули, шерцо, кревово судзини и покрутки. Благе уживане кафи дїйствує вигодно на орґанизем, бо одстранює вистатосц и надражуе шерцову акцию. Познате же ше кофеїн хаснує у медицини як лік, окреме при даяких шерцових хоротох и хоротох кревних судзинох. Прейґмерне хаснованє кафи, односно кофеїну, може буц чкодлїве окреме при нервно лабилних особох, бо виволує зноєнє, нємир и нєспанє.
Кафа ше мелє и тлуче. Млєц ю мож на такволаних турских воденїцох з месинґу. Тота турска воденїца мелє кафу до мелкого праху и вона ше хаснує за пририхтоване такволаней турскей кафи. У остатнїм чаше вше ше вецей хаснує електрични млїн за кафу.
З кафи мож вариц турску кафу, сербску кафу, циґуру, а хаснує ше як додаток за билу кафу, пудинґи, креми, торти, прелїви, сладоляди, муцени сладка, ликери и лядови кафи.