КАКАО

Какао рошнє у тропских крайох Америки, Азиї и Африки. Древо нарошнє и дзешец метери до висоти. Плод му здабе на огурку у хторей ше находза полно нашеня. Нашенє ше перше суши у хладку, та на слунку, а потим ше му знїма лупа и аж после того посила до фабрикох и прерабя.
Какао по смаку горки, а найвецей ше хаснує за фабричне пририхтоване чоколади.
У фабрики за прерабяне какао ше прерабя и мелє на окремних машинох до пращку хтори ше познєйше пакує и предава. Какао у зарну ма у себе 50 проценти масци, а под час млєца до пращку вельо траци од своєй поживносци. Зоз какаа ше достава масц хтора ше хаснує за правенє бонбонох и ґлазурох, а хтора ше вола „какао масло".
3 какаом мож правиц креми, прелїви, а хаснує ше и кладзе менєй-вецей як додаток до каждого колача.


ОЦЕТ

Оцтово печарочки розвиваю ше на висшей температури и окреме у чечносци хтора нє ма вецей як 10 проценти алкоголу. Тоти оцтово печарочки, на нїзкей температури, у стику з воздухом, продукую вренє зоз хторим ше з чечносци з дакус алкоголу направи оцет.
Тот процес вреня тирва длугши час. Оцти єст рижни, а найлєпши гевтот хтори ше достава з вреньом даякей овоци або грозна. То чечносц хтора ма у себе оцтову квашнїну и воду, а у обисцу ше хаснує як присмак у єдлох и як средство за конзервованє поживи за жиму и желєняви.

СОЛЬ

Єст два файти солї: камена соль и морска соль. У кухнї ше троши камену соль, док ше морска соль у кухнї хаснує лєм кед ше рихта сладоляди.
Камена соль пред хаснованьом муши буц осушена, потим потлучена и конечно преошата понеже ше у нєй находзи досц нєчистоти. Мож купиц осушену, зомлєту и преошату.
У вельких количествох соль нє треба хасновац, бо може начкодзиц орґанизму понеже ше вона и иншак находзи скоро у шицких поживових артиклох.
Понеже соль уцагує до себе воду, найлєпше ю тримац у древених и склєняних солянкох, бо кед ше трима у плехових шкатулох, шкатула швидко заардзави.
У конзервованю поживи за жиму и меса, у правеню продуктох з млєка, соль ма важну улогу. Вона одличне средство, бо знїщує бактериї.
У солянкох хтори ше виноши на стол соль треба частейше меняц, а солянки тримац у шоре.