Надпомнуце: По истим рецепту мож на крекер класц и рибу зоз конзерви, колбаси порезани на колєчка, кулену, шунки порезаней на лїсца зоз паштетами, сиром за намасцоване, увареней говедзини и под.

КАПУСТА ЗОЗ ШКВАРКАМИ
Квашну капусту видавиц, але нє барз же би остало у нєй и кус юшки, та ше покладзе на тепшу до пеца, або рерни, а по нєй ше покладзе фалатки масци и положи най ше добре випече. Кед капуста мегка, до нєй положиц шкварки цо остали од випражованя масци и знова положиц най пуща кус зоз своєй масци до капусти. Така капуста ше є цепла.

КРОМПЛЇ НА ГУСТО
Очисцену килу кромпльох ше пореже на колєчка, посолї и залєє з воду тельо же би их вода прикрила. Док кромплї нє уварени, пририхта ше запражку (ложку масци, ложку муки, кус мелкей паприґи и з трома стручами цеску пошеканого на дробно). З уварених кромпльох ше одбере варешку води и з ню розридзи запражку, та ше улєє до кромпльох котри муша ище раз преврец з тоту запражку. Дотля ше на палачинкарнї випражи шкварки зоз сланїни и кед кромплї готови — поверх нїх ше кладзе тоти шкварки и є ше звичайно з ярню желєну шалату (понеже ше сланїну на шкварки реже уж теди кед инше нєт цо єсц у обисцу).

КРОМПЛЇ НА КВАШНО І
Очисц кромплї, пореж на коцки и увар у сланей води. Уварени подав у тей води и направ запражку (масц, мука, пошекана цибуля и мелка паприґа), додай ю до кромпльох и довар. Поквашнї, а пред ношеньом на стол додай дакус шметанки.


КРОМПЛЇ НА КВАШНО II
Дас пол кили кромплї ше очисци и пореже на длуговасто, попражи на ложки масци на котрей ше пражи и єдна цибуля