пошекана на дробно. Же би ше нє прилапйовало на дно, долїва ше кус води та ше кромплї и цибуля, у ствари, динстую. Кед одмегчаю, дода ше мелкей паприґи и шицко залєє з воду. До уварених кромпльох пущи ше вайцо-два и шицко ше розмиша же би ше вайца роздробели. Добре додац децу-два шметанки.

КРОМПЛЇ „НА ПАПРИҐАШ"
То єдло худобне як и векшина тих „ридких" руских єдлох, алє ше у сущносци рихта як паприґаш, лєм без меса. Значи, нашека ше досц цибулї, добре подинстує на масци, дода ше кромплї, мелку паприґу, посолї ше по смаку и залєє так же би було густе як паприґаш.

КРОМПЛЇ ФАШИРОВАНИ
Очисц кромплї, пореж на коцки и увар у сланей води. Уварени прецадз, подав и додай на масци попражену цибульку, попру, сирове вайцо и дакус муки. Розмишай, прав у рукох з того нєвельки поґачи, праж у врацей масци. Є ше их зоз пасулю на густо, а ище найбаржей смакує зоз капустову шалату.

ЛАЗАНЯ (италиянски специялитет)
Потребне: 300 ґ муки, 250 ґ мишаней желєняви (як за юшку), але нє обовязне, од 300 до 590 ґ млєтого меса (мишане), 3/2 л парадичанки (кечапу), ориґано по смаку, соль, масц або олєй, кляґани сир або трапист (тварди) 100 ґ, вайцо, шметанка 1/4 л, 1 векша цибуля, мелка паприґа и попер.
Поступок: Замишац цесто з муки, дакус солї и води и направиц дас пейц ценки цеста таки як судзина у хторей ше будзе печиц. Цеста вивариц у води з дакус солї и олєю. Повинїмац их з води и охладзиц на столє.
На масци попражиц цибулю на дробно пошекану. Додац млєте месо и желєняву (нє муши ше) и динстовац док нє змегча. Вец додац дакус мелкей паприґи, веґети або солї, попру по смаку. Попражиц и заляц зоз парадичанку (кечапом) и додац ложичку ориґана. Вариц на цихим огню дас годзину док нє загушнє.
Сир порезац на ценки пантлїки (кед є кляґани) або потрец на тарлє на велько (трапист).