Шметанку вимишац з вайцом.
До глїбшей тепшички складац: єдно цесто, додац од верху месо, посипац зоз сиром и преляц зоз шметанку. Так шоровац покля ше шицки цеста нє потроши, а закончиц з месом, сиром и шметанку. Поджобац з видлїчку же би ше шметанка ровномирно розляла през шицки цеста.
Положиц до рерни и печиц покля ше на верху нє направи красна жовта скорка.
Сервировац мож цепле и охладзене.

МУСАКА 3 БЕЛАВИХ ПАРАДИЧОХ
Очисци ше и умиє 3—4 белави парадичи. Пореже ше на кружки, обари у сланей води, прецадзи, замача до розтрепаних вайцох и презлох, та ше пражи на горуцей масци. До миски (або тепши) ше склада шор парадичох, шор филу, вец заш шор парадичох итд. Наполнєну миску ше прелєє з мишанїну 10 ложкох шметанки и 2 розтрепаних вайцох. Потим ше положи до рерни же би ше запекло. Фил ше прави так: у шерпенї ше пражи 4—5 главки пошеканей цибулї и 1 варешка масци. Кед цибуля почервенї, усипе ше 1 кґ зомлетого швиньского меса и 1 шольку очисценей и умитей рискаши, посолї ше, закриє и — з нєпреривним долїваньом лїтней води — сциха ше динстуе. Кед рискаша одмекнє, знєє ше ю з огня и зохаби ше хладзиц. До охладзеного филу дода ше 1 цале вайцо, попопрує по смаку и добре премиша.

МУСАКА ЗОЗ КУКУРИЦИ ЦУКРОВКИ
Пририхтує ше за 4 особи.
Потребне: 1 кґ кукурици цукровки, 300 ґ млєтого говедзинового (швиньского) меса, 100 ґ порезани кромплї, 100 ґ порезаного карфиолу, 100 ґ розпущеного сира, 50 ґ масла, веґету, соль, попер, горку млєту паприґу, петрушково лїсце.
Поступок: Кукурицу цукровку увариц 5 мин. у горуцей води, одцадзиц и динстовац на маслу з веґету 10 мин. Уварени кромплї и карфиол одцадзиц и помишац зоз кукурицу. Масу подзелїц на два часци. До огньостойкей судзини положиц єдну часц маси, прейґ того млєте месо посолене зоз солю, попром, петрушковим лїсцом и, на концу, другу часц порихтаней маси. Од горе положиц розпущени сир и горку млєту паприґу. У зогратей рерни запечиц же би почервенєло.
Сервировац у огньостойкей судзини.