ПАПРИҐИ КАЛУДЄРСКИ
За єдну особу вибрац по два паприґи бабури стреднєй велькосци, лєбо длугокейкончистей паприґи. Паприґу упечиц яґод за шалату од печеней паприґи на плотни, очисциц ю од скорки и виняц корень. Паприґа ше нє шме барз печиц же би те при полненю не роздарла и вец фил випаднул вонка. До окремней судзини правиме фил зоз кравского сира 100 ґр по особи, а на кажди два особи єдно вайцо посолїц по смаку, додац на два особи 1 ложичку веґети и петрушкового нашеканого лїсца, коло того треба додац на дробно порезаней шунки на кажду особу 5 дкґ. Шицко добре розмишац и зоз тим филом полнїц паприґи. Зоз швижей нєпеченей паприґи одрезац покривки зоз хторима ше завера отвор през хтори ше паприґу полнело, же би фил не вишол вонка док ше пече. Кажду паприґу добре оваляц перше у муки а до окремней судзини замуциц вайца до хторих ше паприґа добре намача и потим добре обложи зоз отрушинами. Зограц олєй лєбо масц (глїбоку) и паприґи печиц док нє почервеня (коло 5—7 минути). Ґу паприґи ше сервира тартар мачанку хтору ше прави зоз майонезу (єдно паковане у мещку) и додац два дробно порезани квашни огурки (менши) алє их скорей того добре одцадзиц од соку, додац два ложки капари (капри). Кед нє маце, вец даскельо маслини порезани и додац петрушкового лїсца нашеканого два ложки и сок зоз ферталь лимуна. Паприґа шс сервира прелята зоз тартарову мачанку лєбо ше мачанка окреме сервира у заєднїцкей судзини. Паприґи мож правиц и без шунки и вец нє маю вельо калориї.


ПАРАДИЧИ ПОЛНЄНИ ЗОЗ СИРОВИМ МЕСОМ И ЖОВЧКАМИ
Материял потребни за штири порциї: Штири твардо уварени вайца, 300 ґ говедзини з бифтеку, 30 ґ дробно пошеканого петрушкового лїсца, два струча дробно порезаного цеску, солї, попру, сок з двох лимунох, штири тварди парадичи и 100 ґ майонезу.
Уварени вайца очисциц од лупи, розрезац их воздлуж на половки, повинїмац жовчки и порезац их на дробно. Додац им петрушково лїсце, цеснок, посолїц, попровиц, уляц сок чоз лимуну, шицко добре премишац и тримац у змаржляку 4—5 годзини, а з нїм ведно и парадичи.
Єдну годзину пред послуженьом шицко виняц зоз змаржляка. Парадичи отвориц з верху и одрезац покривку, вичисциц их зоднука и стредок вируциц. Парадичи полнїц зоз порихта-