ПИЦА НАПОЛИТАНА
За штири особи.
Состойки за цесто: 400 ґ муки, 1 ложичка солї, 20 ґ квасу, 2,5 дл лїтней води, 3—4 ложки олєю.
Состойки за премасцованє: 3 главки цибуї, 3 струча цеску, єдна трецина шольки олєю, 1 конзерва очисцених парадичох од лупкох, 2 менши конзерви парадичового пиреа (коло 140 ґрами), 1 ложичка вашильцу, 1 ложичка ориґану, пол ложички цукру, дакус солї и попру, 2 желєни паприґи бабури порезани на длуговасти фалатки, 8 колєчка салами, 200 ґ на грубше натартого сира (ґауда або айдамер).
Поступок: Квас розмочиц у води и направиц гладке цесто з муку и дакус солї. Цесто посипац з муку, закриц и охабиц два годзини най кишне. Розогнац штири округли цеста (коло 30 см радиюса, як на лепинї або белюши) и положиц их до тешпох посипаних з муку. Очисциц цибулю и цеснок, порезац на дробно и пражиц на олєю док дакус нє пожовкне. Додац парадичови пире, вашилєц, ориґан, цукер, соль и попер. Вариц сциха коло 45 минути мишаюци з часу на час. Охладзиц и мишанїну єднак роздзелїц на шицки цеста. На верх поскладац паприґу, саламу и сир. Преляц з дакус олєю, печиц на 250 ступні на споднєй прегради рерни 15 минути.

ПОЛНЄНА ВЕКНА БЕЗ МЕСА
Купиц пейц французки журвекни, одрезац им конци, а стредок розрезац на половки. Виняц мекушку зоз стредку так най отсанє лєм скорка.
До судзини нарезац на коцочки увареней желєняви и то уварени кромплї, уварени млади гращок, мархву, уварени целер, же би шицко вєдно було 1 кґ. Додац 300 ґ на тарлу тартого сира (твардого) и ище додац пейц твардо уварени и на коцки порезани вайца. Окреме треба на дробно порезац два цибулї стреднєй велькосци, а исто так и паприґи швижей лєбо з дунца. Од присмакох додац веґети, два юхово ложки, дакус попру, млєтей паприґи, солї и єдну ложку сенфу и два ложки парадичовей каши (кед нєт каши, вец 1 дл парадичанки). Чарни маслини очисциц од маґочкох, порезац на дробно 10 деки и шицко добре премишац.
Паклочко масла 1/4 кґ розпущиц и горуце уляц до порихтаней маси, а окреме мож порихтац и розпущени аспик (желатин — мож го купиц у предавальньох у ременьох) и вєдно з аспиком шицко помишац.
Векни треба полнїц зоз филом и треба мерковац най нє оставаю пражнїни. Наполнєни векни охабиц до фрижидера и закруциц их до фолиї же би ше скорка з хлєба не сушела.