Кед филу останє, а векни вецей нє маце, вец остаток филу треба закруциц до твардей фолиї так най випатра на округло и исто охабиц до змаржляка.

ПОЛНЄНА ВЕКНА З МЕСОМ
Прави ше исто так як и без меса, лєм ше тераз менєя бере желєняви, а додава ше нарезаного меса зоз печеня и сухомесових продуктох по своїм находзеню. Ту ше обично кладзе краї зоз колбасох, уварени язик, гамбурґскей сланїни, шунки и под. Полнї ше исто як и горе наведзене; розлика у тим же перши рецепт можу єст веґетариянци и хори, а други можу єсц лєм здрави особи.
Способ сервированя: Кед треба сервировац векни, виняц их зоз фрижидера, ошлебодзиц их од фолиї и резац на колєчка. Одрезани фалатки складац на тацни хтори маю вельку поверхносц, а кажди фалат ище од горе украшовац з майонезом, шалату, петрушковим лїсцом и др. Розрезани фалати-сендвичи маю випатрунок мозаїка, декоративно випатраю, а окреме кухарки можу своїм госцом указац и свою схопносц у декорованю.
Зоз филу хтори остал у фолиї можеме правиц фриштик.
Кед нє маме госцох, тиж мож нарезани фил на колєчка панировац з вайцами и пражиц фашири хтори ше сервирує зоз додатком тартаровей мачанки.
Надпомнуце: При пририхтованю таких специялитетох ше нє мушице притримовац рецепта як є ту написани, алє можеце сами комбиновац правенє филу з додатком рижних месох, риби и под.

РАТОТА ЗОЗ ПАРАДИЧУ
Розбий вайца як за ратоту, посоль и улєй парадичи (парадичанки дакус), розмишай и улєй на горуцу масц, та праж як обичну ратоту.

РАТОТА ЗОЗ ШКВАРКАМИ И ПАПРИҐУ БАБУРУ
За штири особи: У шерпенї зограц 1 дл олєю и додац три стреднї главки нарезаней цибулї, додац 20 дкґ шкварки (кед су векши, порезац их на менши фалатки) и попражиц их, наляц з воду и пражиц док ше вода нє випари (сциха, помали). Додац штири нарезани бабури, засмачиц зоз солю, папригу и попром, розбиц 8 вайца и печиц док ше вайца нє ствардню. Сервировац такой.