му и кед ше премасци на обични або швижо препечени хлєб, то барз смачни прилог або такволане пред'єдло.

СТУДЗЕНЇНА
Вежнїце дас 1 кґ або 1,5 кґ швиньски ратици, уха, дробни часци з глави и худу часц хвоста. Добре умиц, очисциц од заостатей шерсци и положиц до досц велького гарчка, та аж под сам верх заляц зоз жимну воду и дакус охабиц най затугне. Потим положиц на огень най вре. Кед почне виходзиц пена, треба ю позберац и вируциц. Кед ше престанє пенїц, положиц даскельо зарна попру, дакус петрушкового кореня, пастернаку, мархви, 1—2 главки цибулї и 3—4 струча цеску и посолїц по смаку. Охабиц най вре потамаль, покля ше месо нє почнє лєгко оддзельовац од косцох. Теди студзенїна уварена. Юшка треба же би була дакус лїпкаца. То знак же ше стидне док ше охладзи. Потим ше гарчок знєє з огня и юшка ше з нього прецадзи до другей судзини. Ратици и друге месо ше порозклада до одвитуюцих мисочкох або танєрох, прелєє ше з юшку и охаби на жимне место най ше застиднє.
Студзенїна барз прикладна як пред'єдло, особлїво вжиме. Може стац и по даскельо днї, а велї ю дзечнє єдза посипану од верху зоз мелку паприґу и дробно нашеканим цеском, або зоз натартим хрином.

СТУДЗЕНЇНА ЗОЗ КУРЕЦИНИ
Куру увариме у юшки, месо винєме, очисциме од косцох и порежеме го на ценки длугоки фалатки (форма яґод порезани кромплї за помфрит). До 1/4 л води намочиме 12 лїстки желатину лєбо 25 ґ аспику у пращку (желатин и аспик мож кутщ у предавальнї — желатин на лїсца, а аспик у пращку). Розпущени желатин у жимней води додаме до увареней юшки, помишаме и додаме 1,5 дл билого вина. Юшки и желатину вєдно треба най будзе 1 литра. Шицко засмачиме по своїм смаку. Пририхтац векшу украсну судзину до хторей будземе правиц студзенїну, по можлївосци же би була превидна. На дно перше налєєме дакус юшки и причекаме же би ше згусла, потим на першу згуснуту подлогу розпоредзуєме месо и складаме го так же би мало даяки фиґури лєбо же би було симетрично поскладане, а коло меса додаваме и фалатки парадичи, уварени печарки и потим заш прелєєме зоз юшку хтору тримаме на лїтней ринґли. Охабиме заш най ше стиднє и знова правиме ище єдно пасмо од меса, шалати, гращку, а мож додац и квашени огурки. Кед ше заш згушнє, шицко залєєме з остатком юшки ище раз и положиме до змаржляку.