Студзенїну сервируєме лєбо директно у украсней судзини, лєбо ю витрешеме на тацну и около украшиме з младу редквочку, младу цибулю, а ґу тому мож сервировац и кромпльову шалату. Студзенїну мож налївац и до вецей менших превидних судзинох и так каждому правиц порциї. Гу студзенїни место обичного хлєба сервировац пражинки, а може и майонезу.
Студзенїну мож правиц на вецей способи, цо завиши лєм од того же зоз чим ше студзенїну полнї, та так мож хасновац лєм желєняву хтору поскладаме у даяких фиґурох, вец мож правиц лєм зоз шунки и ин.

СУФЛЕ ЗОЗ СИРОМ
За штири особи: Масла 100 ґрами, єдну малу ложичку млєтей паприґи, солї, 6 вайца, 200 ґрами наструганого сира на тарлє, млєка 2 дл, 2 ложки квашней шметанки и три ложки муки.
Замуциц (витрепац) на пену масло, соль и паприґу (масло розпущиц, алє най нє будзе горуце), додавац єден по єден перше лєм жовчок, поступно и додац сир, млєко и шметанку, а зоз бильчкох окреме витрепац пену и додац тому филу и помали премишац. Таку филмасу насипац до огньостойкей склєняней судзини хтору перше премасциме з маслом и посипеме з муку. Положиц до зогратей рерни на 250 ступнї и печиц коло 10 минути. Єдло служиц такой.

ХЛЄБИКИ ЗОЗ ЗАПЕКАНИМ СИРОМ
Потребне: хлєб, масло або масц зоз печенїни (мож похасновац и колбасову), сир, дакус мелкей паприґи.
Поступок: Нарежеме фалатки хлєба (може буц и сухши), намасциме их з маслом або з масцу и вец на нїх натреме сира, посипеме з мелку паприґу и положиме до рерни запечиц. Сервируєме ище док су цепли.


ЦЕЛЕР ПОХОВАНИ
Потребне: 60 дкґ целеру, мука, презли, 1 вайцо, соль, 15 дкґ масци, вода, дакус млєка.
Поступок: Очисцени и умити целер положиме увариц до врацей сланей води на мегко. Порежеме го на 1 цм груби колєчка. Оваляме их у муки, у посолєним вайцу до котрого зме доляли кус млєка, и у презлох. Пражиме на горуцей масци на червенкаво и сервируєме зоз кромпльовим пиреом и шалату або компотом.