цвиклу. Поцукруй и пооцтуй по смаку. Месо мож порезац на менши фалатки и помишац до борщу, а мож го и окреме єсц. (Тот месови борщ мож вариц зоз каждого меса, алє є найсмачнейши зоз курецини.)
б) Посни борщ: Увар юху зоз желєняви (полож петрушку, мархву, пастернак, целер, фалат з очисценей цвикли, дакус сладкей капусти и цибулї). Окреме увар червеней цвикли и капусти окреме як при месовим борщу. Кед ше юха уварела, прецадз, а до нєй додай одцадзену капусту и посоль по смаку. Тераз направ запражку (масц, мука и дробно шекана цибулька) и додай до борщу. Кед добре преварло, прецагнї набок, а додай цвиклу, даскельо ложки шметанки, поцукруй и пооцтуй по смаку.

ВАЙЦОВА ЮХА
На дробенко пошекац цибулю и динстовац ю з варешку масци. Долївац покус води же би ше цибуля нє розпадла. Додац пол варешки муки и кед ше кус попражи, додац дакус мелкей паприґи и єден бобков (ловоров) лїсток, заляц з воду и посолїц. Кед превре, пущиц до юхи даскельо цали вайца (розбити), єдно по єдно, и нє мишац, же би вайца остали цали. Кед сипеме до миски, мож додац два ложки шметанки и спрам смаку поквашнїц, гоч и з лимуном хто люби.

ГОВЕДЗИНОВА ЮХА
На килу меса ше звичайно бере 2 л води. Месо ше перше умиє у цеплей води, вец ше положи до гарчка, налєє ше жимней води и пристави ше вариц. Накадзи почне врец, на поверхносци ше зяви пена, алє ю нє треба знїмац, бо ма у себе хасновити состойки. У медзичаше очисциц и добре умиц: єден штреднї пастернак, 2 петрушки, дакус петрушкового лїсца, фалаток целеру, єдну до два мархви, єдну главку цибулї, даскельо струча цеску, дакус келераби. Годзину и пол потим як вода почала врец положи ше тота желєнява до нєй, посолї ше и дода 7 до 8 зарна попру. Потим гарчок поцагнуц на цихи огень же би помали але нєпреривно варло 2 до 2 и пол годзини. Юха нє шме нагло врец, бо ше замуци.
Кед є уварена, юху ше знєє з огня и зохаби най ше ушеднє. Вец ше ю прецадзи до судзини дзе ше буду виварйовац резанки (галушки). Алє галушки лєпше окреме вивариц. У гарчку дзе ше юха варела най з нєй дакус останє же би ше месо нє висушело. Месо ше пореже на фалатки и окреме вислугує.