ГРАЩКОВА ЮХА

На масци упраж на дробно пошекану цибульку, кед уж почервенєє додай пошекане петрушково лїсце и очисцени умити желєни гращок. Прикрий з покривку най ше так пражи (динстує). Кед гращок уж мегки, а вода з нього виварла, одкрий и посип з муку. Дакус най ше попражи, а вец улей тельо води кельо сцеш юхи. Додай даскельо очисцени и на коцки порезани млади кромплї. Посоль по смаку и полож на шпоргет най ше увари. У тей води, цо з ню залїваме гращок, мож увариц главу, ноги, пупорок, печинку и шию з курчеца; теди, розуми ше, будзе юха ище смачнєйша.

ҐРИСОВА ЮШКА
Потребне: 3 ложки розпущеней масци, 2 ложки ґрису, 1 вайцо, веґети, мелкого попру, солї, мелкей паприґи, целерово або петрушково лїсце, вода.
Поступок: До шерпенї положиме зограц масц, додаме ґрис, попражиме на червенкаво и охабиме най ше охладзи. До охладзеного ґрису додаме 1 цале вайцо, добре розмишаме, додаме веґету, попер, соль, паприґу, 2 литри цеплей води и положиме вариц. Кед почне врец, зохабиме ю най вре дас 5 минути на цихим огню. На концу додаме на дробно пошекане петрушково або целерово лїсце.

ГРИСОВА ЛЄБО ТАРГОНЬОВА ЮХА
Попраж на масци ґрис лєбо таргоню на червено. Додай на дробно пошекану цибульку, та попраж на червено и додай пошекане петрушково лїсце, помишай, залєй з воду, посоль и довар. Кед маш ношиц на стол, додай пар ложки шметанки.

ГУЛАШЮХА
Варешку масци и дакус на дробно порезаней сланїни препражиц у гарчку, та тому додац два главки пошеканей цибулі. Кед цибуля одмегча и почервенї, додац ложку червеней паприґи и на коцки порезану говедзину (пол кили на 6 особи), та закрите динстовац и куспокус додавац лїтней води. Кед месо одмегча, долєє ше тельо води кельо ше юхи жада. Кед юха