У шерпенки зограц масц, положиц до нєй на дробно порезану цибулю и муку, а кед мука почервенї, положиц мелку паприґу и ище кус попражиц. До запражки додац дакус капусней юшки, премишац, а потим умишац до увареней капусней юшки и додац юшку з веґети. Посолїц по смаку и вариц коло пол годзини.
До юшки мож завариц резанки, галушки, рискашу, виршли (хриновки) або колбаси порезани на колєчка.
Пред сервированьом витрепац жовчки зоз квашну шметанку або каймаком та помали улївац до юшки.

КАПУСНА ЮШКА І
Два часци води и єдна часц капусней юшки (гоч би у нєй и остала даєдна капуста) ше превари, посолї по смаку и завари з тарганима галушками без вайца.
Так варена капусна юшка за Вельки пост. Медзитим, вона ше може злєпшац з малу билу запражку: на варешки масци попражиц кус муки и усипац до юшки (перше розхладзиц и розмишац з кус юшки же би ше не скулькала). Тиж и цесто може буц з вайцом.

КАПУСНА ЮШКА II
Ферталь кили квашней капусти (дас єдна гарсц), 1/2—1 литри капусней юшки, води по смаку, єдна векша цибуля, дакус попру, пол кили сухого меса и сухей колбаси або три ферталї кили говедзинового меса, 1/4 литри парадичанки, солї, дакус цукру, 3 ложки масци, 2 ложки муки, 1 ложичка мелкей паприґи, 1 мала цибулька або 4 струча цеску, 4—8 фалатки сушени печарки, резанки або кромплї, веґета.
Поступок: До гарчка положиме квашену капусту, капусну юшку, воду, надробно порезану цибулю, попер, вимочене сухе месо (колбасу) або швижу говедзину, соль, веґету и вариме дотля док месо нє одмекнє. Кед маме при руки, положиме и сухи печарки, котри даваю добри смак. Уварене месо з юшки винєме, а юшку запражиме. З масци и муки порихтаме червенкаву запражку, доложиме до нєй потарту цибулю або на дробно пошекани цеснок и попражиме. Потим умишаме мелку паприґу, залєєме зоз жимну воду и кед зовре, умишаме до врацей юшки. Вецка до нєй доложиме парадичанку, поцукруєме. и охабиме най превре. Гу юшки сервируєме кромплї уварени у сланей води або резанки.