КВАШНА ЮХА БЕЗ ШМЕТАНКИ
На дробно пошекаме цибулю и пражиме, по можлївосци, на живинскей масци. На ценки карички порежеме петрушку и мархву. Динстуєме. На концу додаме на дробно пошекане петрушково лїсце. Додаме месо, та далєй динстуеме, док месо нє одмекнє. Залєєме з цеплу воду, посолїме и вариме. Скорей як є готова, улєєме до юхи дакус млєка, та най превре, и додаме два до три ценки фалатки лимуну, та ище превариме.

КВАШНА ЮХА ЗОЗ ШМЕТАНКУ
Тота юха ше готує як и говедзинова. Мож ю вариц зоз живинского, целячого або баранчецового меса (єдно курче або 0,5—1 кґ меса). Месо ше пореже на дробнєйши фалатки.
Тота юха ше розликує од говедзиновей лєм по тим же ше до нєй кладзе запражка, и то така: варешка масци ше зогрее у малей шерпенї, дода ше 2 до 3 главки пошеканей цибулї, та кед цибуля одмегча, дода ше варешка муки и дакус червеней паприґи. Готова запражка ше додава юхи до хторей ше положи ище єден ловоров лїсток, фалаток лимуновей лупи, та ше поквашнї (мож и з лимуном) и посолї по смаку и далєй вари 10 до 20 минути. Теди ше до того положи гарсц рискаши. Кед рискаша мегка, готова юха ше улєє до миски у хторей пред тим розмуцени два до три ложки шметанки и єден жовчок.


КЕЛЕРАБОВА ЮХА
Очисц келераби и пореж на резанки. На горуцу масц полож пошекане петрушково лїсце и порезани келераб, та прикрий най ше у своєй пари пражи (динстує). Кед уж келераб мегки, посип з муку, дакус попраж, а вец залєй з воду лєбо з юху, як то спомнуте при гращковей юхи. Посоль и довар.

КОПРОВА ЮШКА
Потребне: 2 ложки масци, єдна ложка муки, 1 цибуля,1 звязка копру, 2 литри води, солї, дакус цукру, оцту, 1 дл шметанки, 4 вайца.