у гарчку дзе єст половка води и половка юхи (говедзиновей або курчецовей). Кед уж уварене — мож до нєй вдериц вайцо и добре розмишац, та таке класц на стол.

РУСКА ЮХА
Умиц ферталь кили говедзини, порезац на дробни коцки, положиц до гарчка, наляц два литри води, закриц и вариц. О годзину додац ферталь кили на коцки порезаного швиньского меса и далєй вариц. През тот час порезац главку цибулї, очисциц и на коцки порезац єдну петрушку, єдну мархву, єден пастернак, єден целер, та шицко тото посолїц и динстовац на цихим огню у меншей закритей шерпенї. Кед желєнява одмегча, додац варешку муки, дакус пошеканого петрушкового лїсца, ложичку мелкей паприґи, дакус попражиц, а вец уляц дакус лїтней води. Шицко тото усипац до гарчка дзе ше вари месо, та додац ище дакус нашеканей сладкей капусти. Предлужиц з вареньом док капуста нє одмегча. Пред кладзеньом на стол мож додац 3—4 ложки млєка, або 2—3 ложки шметанки, и нєпреривно мишац же би ше добре розмишало.

„СВАДЗЕБНА" ЮХА
Дакеди ше за добру курову юшку гуторело „як на свадзби", цо значи же вона мала окремни смак. Така смачна юшка ше рихта подобнє як и кажда курова юшка. Вибера ше досц масна и нє млада кура, або когут, пририхта за варене и цалу спущи до пейцлитрового гарчка та ше прелєє з трома литрамп жимней води котра ше посолї. Док ше месо почина вариц на цихим огню, порихта ше два коренї петрушки, два кореньчки мархви (гладки червени), два цали цибулї, єден целер и шицко положи ґу месу. Пред сам конєц вареня дода ше 2—3 фалатки мушкатли од котрих юшка запахне и достане златни шпляхи.

ФРАНЦУЗКА ЮХА
Желєняву (мархву, петрушку, пастернак) очисц и пореж на ценко, полож до горуцей масци у котрей уж єст пошекане петрушково лїсце, прикрий з покривку най ше так пражи (динстує). Кед ше вода зоз желеняви випражела, постало шицко мегке, посип з муку, попраж и залєй з воду. Посоль и попопруй по смаку, а вец додай на коцки порезани кромплї и довар. Пред ношеньом на стол додай пар ложки шметанки.