ЦЕЛЯЧА ЮШКА
Потребне: 1/2 кґ целячого меса з карку, 1 цибуля, 2 ложки масци, попру, солї, 2 кромплї, желєняви (петрушки, мархви, пастернаку), желєна паприґа, пол келераба або 4—6 струча карфиолу, пошекана желєна петрушка або целер, 1 ложка муки, вода.
Поступок: У шерпенї на масци попражиме на дробно порезану або натарту цибулю док нє почервенї. Вец положиме умите и на коцки порезане целяче месо, посолїме, попопруєме и динстуєме дас 1 годзину. Доложиме на коцки порезани кромплї и келераб (або карфиол), єдну желєну паприґу и вєдно динстуєме. На концу залєєме з литру и пол цеплей води и охабиме най зовре. Юшку загушнєме так же муку розмишаме у дакус води и усипеме до юшки. На остатку додаме на дробно пошекане петрушково або целерово лїсце и охабиме най дакуе превре.

ШВИНЬСКА ЮХА
Вари ше як и говедзинова юха, лем же ше хаснує швиньске месо, по можлївосци нє пребарз масне.

ШУНКОВА КВАШНА ЮШКА
Кед шунка уварена, чкода тоту воду виляц. Вона звичайно барз моцна, масна и слана, та ше ю найчастейше розправя половку води. Ю ублажую и 2—3 розтрепани вайца котри ше попуща до нєй, а таке дїйство маю и таргани галушки (з муки и кус води, зоз єдним вайцом, або и без вайца). Же би юшка була ца ситша и пикантнєнша, мож додац децу-два шметанки.
Тота юшка барз сита и може замонїц, поводзме, вечеру кед ма у себе досц вайца и шметанки. Сучасна ґаздиня би могла додац и єден лимун порезани на колєчка, або даскельо капки оцту, а завариц нє зоз тарганима галушками, але з у нєсланей води виварену и премиту рискашу. И шунка будзе смачнейша, а и юшка будзе пикантнєйша кед ше з ню будзе вариц и даєдеи ловоров лїсток. З фалатками меса орезанима зоз шунки, котри ше одтарговали або були нєприкладни за виношене на стол, то комплетне єдло.