Поступок: Мозоґ обариме зоз слану воду и охабиме най дакус постої у води; вец го очисциме од бланох. У окремней шерпенки попражиме цибульку и ґу нєй додаме мозоґ. Вец посолїме, попопруєме, додаме желєну петрушку и охабиме най ше охладзи. До охладзеного умишаме жовчок и тельо отрушинїси же би ше могло правиц ґомбовчики котри заварюєме до врацей юшки. Барз су смачни у юшки з косцох.

ОТРУШИНКОВО (ПРЕЗЛОВО) КУЛЬКИ
Потребне: 1 вайцо, жовчок, 3 ложки розпущеней масци, соль, попер, пошекана желєна петрушка або целер, отрушинки (презли).
Поступок: Цале вайцо и жовчок добре розмишаме з масцу, посолїме, попопруєме. Додаме пошекане желєне петрушково або целерово лїсце и примишаме тельо отрушинки же бизме зоз тей маси могли правиц мали кульки з мокрима дланями и такой их кладземе до врацей юшки. Тоту масу можеме порихтац и на мегчейше, та галушки викравац з ложичку котру зме пред тим намочели до врацей юшки.

ПЕЧИНКОВО ҐОМБОВЧИКИ (ГАЛУШКИ)
Потребне: 8—10 дкґ швиньскей печинки, целячей або живинскей, 1 стредня цибуля, 4 ложки отрушинки (презли), 3 ложки розпущеней масци, солї, попру, пошеканей желєней петрушки або целеру, 1 вайцо.
Поступок: Умиту печинку помелєме на машинки за месо або ю пообераме од жилкох и пошекаме на дещички и положиме до судзини. Ґу печинки додаме цале вайцо, порезану цибулю, попер, соль, масц и тото шицко помишаме з варешку. На концу додаме отрушинки (презли), дробно пошекану желену петрушку або целер и охабиме дас ферталь годзини стац. Може и длужей. Вецка зоз того на помученей табли правиме мали ґомбовчики и кладземе их до врацей юшки. Перше положиме лем єден ґомбовчик, та кед ше будзе розпадовац, до мишанїни доложиме дакус отрушинки. Ґомбовчики можеме правиц и так же зоз тей мишанїни з малу ложичку береме и пущаме до юшки. Тоти ґомбовчики даваю юшки барз добри смак.
Таки ґомбовчики швидше можеме пририхтац у миксеру, и то так же перше у миксеру розмиксируєме єдно цале вайцо, потим през отвор на покривки поступно додаваме на дробни