БОСАНСКИ ГАРЧОК І
Потребне: мишане месо 1 кґ з говедзини, баранїни и швиньского, 100 ґ сухей сланїни порезаней на коцочки, 150 ґ дробно порезаней цибулї, 150 ґ на дробно порезани цеснок, 250 ґ желєняви (петрушка, целер, мархва, пастернак) порезани на округли фалатки, 750 ґ очисцени и на коцки порезани кромплї, єдна целяча ратица (целяча нога), солї, попру, два ложки нашеканого петрушкового лїсца, 1/2 лит. билого вина и два ложки оцту.
Месо порезац на коцки як на паприґаш. Сланїну пражиц перше, а на ню додац порезане месо. Кед сланїна нє пущи досц масци, вец додац ище дакус. Специялитет ше прави обовязно у ГЛЇНЯНИМ гарчку зоз покривку (може и огньостойка склєняна судзина зоз покривку). До глїняного гарчка ше склада єдно на друге месо, а вец желенява, а до стредку положиц єдну целячу ногу, посолїц и попопровац. Додац петрушково лїсце и целер. На остатку заляц шицко перше з вином, додац оцту и по верх додац води. Гарчок по верху треба заврец прейґ покривки з перґаментом. Рерна ше зогрєє на 225 ступнї и гарчок охабиц 3—4 годзини най ше помали вари — запече.
Надпомнуце: през лєто, у сезони, треба додац и швижу желєняву: паприґу, капусту, парадичи, мауну, гращок, келераб и др. и вец треба водзиц рахунку най ше у правей розмири ище дода вина и води.

БОСАНСКИ ГАРЧОК II
Потребне за 8 особи: 1 кґ говедзини або яловчецини (зоз першох), 250 ґ цибулї, 600 ґ кромплї, 30 ґ парадичанки (пире), 150 ґ мархви, петрушки и целеру, 0,5 л билого вина, 2 лїсца ловору, 3—4 струча цеску, солї, попру у зарну, мелкей паприґи.
Месо пореж на векши коцки, кромплї очисц и пореж на штварцини, а очисцену цибулю на векши фалатки. Струча цеску нє чисциц. Желєняву пореж на колєчка.
До глїняного гарчка складай шор меса, шор желєняви, шор меса, додай попер, ловор, мелку паприґу, парадичови пире (або парадичанку) и на концу швижу порезану парадичу. Посоль и прелєй з вином и додай води тельо най затугнє.
Гарчок прекрий зоз перґамент папером и твардо завяж зоз порвазком. Полож на шпоргет най превре. а потим до рерни (або до парастского пеца) и запекай 2—3 годзини. Под час вареня и запеканя нє отверай гарчок.
Босански гарчок ше сервирує у судзини у котрей є приготовени.