БУНДАВА І
Очисц бундаву, пореж на резанки и посоль. Направ запражку (масц, мука, цибуля и мелка паприґа). Бундаву висцискай и висип до запражки, помишай и залєй з воду (лєбо з кислим млєком, лєбо зоз серватку, а мож и зоз парадичу). Кед залєеш з воду, пооцтуй и додай шметанки, а кед залєєш зоз парадичу, вец до запражки нє полож паприґи. Заляту бундаву вар док не омегча.

БУНДАВА II
Бундаву очисц и пореж на резанки (лєбо потри на тарлє), та ю посоль. Док стої, направ запражку зоз цибулї, муки и дакус мелкей паприґи. Кед запражка готова, бундаву полож до нєй. Премишай и залєй з воду. (Мож заляц и зоз кислим млєком або серватку). Кед ше залєє зоз кислим млєком, вец нє треба поквашнїц. Вариц док бундава нє будзе мегка.

БУНДАВА НАТАРТА
Очисци ше звонка и зоднука и умиє 1 бундава за єдзенє (штреднєй велькосци), а потим те на тарлє (цо ридшим) натре з нєй длугоки резанки. Бундава ше змесци до векшей судзини (хтора нє офарбена), поквашнї, посолї, закриє и охаби най так стої 1 годзину.
През тот час ше приготови запражку: у векшей шерпенї зогреє ше 1 варешка масци, та ше дода 2—3 главки нашеканей цибулї. Кед цибуля почервенї, дода ше 2 варешки муки, дакус червеней паприґи а може и даякей желєняви — по смаку.
Бундаву ше положи до запражки, дакус попражи и налєє ше лїтней води. Посолї ше и поквашнї, кед треба, (До бундави треба лєм покус улївац води, бо вона сама досц води зоз себе вилущує.)

БУНДАВА ПОЛНЄНА
Младу ценку бундаву очисц и видлоб з нєй маґи. Вец ю полож до врацей води, увар, а меркуй най ци ше нє розвари. Винь ю най ше дакус охладзи, полнї ю зоз филом, котри направиш так: зомель на машинки месо, попраж на масци пошекану цибулю, додай порезане месо, посоль и прикрий най ше