ПАСУЛЯ НА ГУСТО
З уж увареней пасулї, чи зоз шунку, чи сланїну є варена або рихтана за подбивку, винє ше з дзираву вареху гарсц увареней: пасулї и за ню пририхта запражка: на ложки масци попражи ше на червено ложка муки з нашеканим цеском и мелку паприґу. Розправена запражка ше усипе до пасулї и вєдно ище раз шицко муши преврец.

ПАСУЛЯ НА ТЕПШИ
Запражена пасуля на густо може буц и окреме уварена за тоту нагоду у сланей води та положена на запражку направену з варешки масци и варешки муки, а до нєй швечи по фалатку курених реброх лєбо домашнєй колбаси. Кед ше така пасуля добре запече (мож и по верху покласц ище масци), вона барз сита и смачна и барз швечи з квашену капусту.

ПАСУЛЯ У ПЕЦУ
Пасуля у пецу ше пририхтує подобнє як и за варенє на шпоргету, але ю лепше ище вечар намочиц же би рано була напучнєта и же би заберала 2/3 пейцлитрового гарчка кед ше до нєй спущи колєнко з орезаней шунки, векшу мархву, векшу цибулю з лупу, а може и єдну петрушку. Шицко тото ше прикриє и положи ґу жирячки дзе годзину-годзину и пол сциха вре. Познєйше ше направи запражка и завари. До запражкн мож додац єдну пошекану цибульку, ложку муки, мелкей паприґи и децу-два парадичанки. Таку густейшу пасулю мож служиц зоз квашну шметанку, або аж и з кислим млєком (нєпрепущованим).


ПИРЕ-КРОМПЛЇ
Очисц кромплї, пореж на коцки, увар у сланей води. Уварени одцадз и подав, додай млєка лєбо шметанки и дакус масци. Патри най ци длуго нє стої, бо страци смак.