ПОЛНЄНИ ПАПРИҐИ
Вибере ше менши под'єднаки желєни паприґи. Очисци ше их од нашеня и жилох, умиє и одцадзи. Паприґи ше полнї зоз филом, пририхтаним на исти способ як и за полнєни бундавки. У векшей шерпенї попражи ше 2 варешки муки у 1 варешки масци, дода ше дакус червеней паприґи и налєє ше уварена и прецадзена парадича. До так порихтаней мачанки спуща ше полнєни паприґи, посладза, посоля и закрити ше далєй варя.

РОЛАТ ЗОЗ ПЕЧЕНИХ ПАПРИГОХ
Дзешец упечени паприґи очисцце и зомельце на машинки за месо и руцце на зограту масц; добре най ше препражи и посольце по смаку. Окреме добре витрепце 5 вайца и з таких витрепаних вайцох (кед сцеце, додайце им кус муки и млєка, та будзе вецей) пражце ценючки палачинки — кельо виду. На кажду палачинку положце попраженей паприґи, закруцце як прави палачинки и служце цепли.

САРМА БЕЗ МЕСА
Увар у води рискаши, упраж на масци пошекану цибулю, та одцадз и помишай з цибулю. Додай солї, попру, сирове вайцо, помишай и прав сарму на лїсцу сладкей капусти. Капустово лїсце зрихтай так: капусту очисц од грубля, попар цалу капусту з врацу воду, пооддзелюи лїсца и кладз до нїх. Покладз сарму до шерпенї лєбо гарчка, залєй зоз слану воду и полож печиц. Єдз зоз цибулькову мачанку.

САРМА У КВАШНЕЙ КАПУСТИ
Умиє ше и змелє кила швиньского меса зоз шунки. У шерпенки ше випражи 1 або 2 пошекани главки цибулї. Кед цибуля почервенї, знєє ше з огня и дода ше ю ґу зомлєтому месу, посолї и попопрує по смаку; розтрепе 1 цале вайцо и пол шольки умитей и одцадзеней рискаши. Шицко ше добре помиша и зоз так пририхтаним филом закруца ше сарми до лїсца квашеней капусти (крижалки). Преостате лїсце посклада те на дно велькей шерпенї, та ше на ньго склада сарми єдну ґу другей, налєє ше з воду и положи вариц. Уварена сарма ше запражи як и квашна капуста.